ໂຣນາວໂດ້ ສ້າງສະຖິຕິຍິງປະຕູທີ 109 ໃນນາມທີມຊາດ ທຽບເທົ່າສະຖິຕິສູງສຸດຂອງ ອາລີ ດາອີ

ຄຣິສເຕຍໂນ້ ໂຣນາວໂດ້ ຫົວໜ້າທີມຊາດໂປຕູເກດ ສ້າງສະຖິຕິຍິງປະຕູໃຫ້ທີມຊາດຫລາຍສຸດ 109 ປະຕູ ພາຍຫລັງຍິງໄດ້ 2 ປະຕູໃນເກມ ຢູໂຣ 2020 ນັດສຸດທ້າຍຂອງກຸ່ມ F ໃນຄໍ່າຄືນວັນທີ 23 ມິຖຸນາຜ່ານມາ, ທີ່ທີມຊາດໂປຕູເກດ ແຊ້ມເກົ່າ ສະເໝີກັບ ທີມຊາດຝຣັ່ງ ຮອງແຊ້ມ 2-2 ທີ່ສະໜາມ ປຸສກັສ ອາຣີນ້າ ໃນນະຄອນຫລວງປູດາເປັສ ປະເທດຮັງກາຣີ ແລະ ສາມາດຊ່ວຍທີມເຂົ້າສູ່ຮອບ 16 ທີມສຸດທ້າຍຕໍ່ໄປ ໃນຖານະອັນດັບ 3 ດີສຸດທີມທຳອິດ.
+ 109 ປະຕູຂອງ CR7 ໄປເທົ່າກັບສະຖິຕິສູງສຸດຂອງ ອາລີ ດາອີ ອະດີດສູນໜ້າທີມຊາດອີຣານ ທີ່ເຮັດໄດ້ໃນລະຫວ່າງປີ 1993-2006 ແລະ ຍິງໄດ້ 48 ປະຕູຈາກ 45 ນັດຫລັງສຸດໃຫ້ທີມຊາດໂປຕູເກດ.
+ ພ້ອມກັນນີ້ ໂຣນາວໂດ້ ກໍສ້າງສະຖິຕິ ລົງຫລິ້ນໃນ ຢູໂຣ ຮອບຄັດເລືອກ ແລະ ຮອບສຸດທ້າຍຫລາຍສຸດລວມ 59 ນັດ ແຊງສະຖິຕິຂອງ ຈານລຸຍຈິ ບຸຟຟ້ອນ ຜູ້ຮັກສາປະຕູທີມຊາດອີຕາລີ 1 ນັດ.
+ ນອກຈາກນີ້ ໂຣນາວໂດ້ ເປັນນັກເຕະຈາກເອີຣົບຄົນທຳອິດ ຍິງປະຕູຫລາຍສຸດໃນບານລະດັບເມເຈີເຊັ່ນ: ຢູໂຣ ແລະ ບານໂລກ ລວມ 21 ປະຕູ ທຳລາຍສະຖິຕິຂອງ ມິໂຣສະລາຟ ໂຄເຊ່ ອະດີດສູນໜ້າທີມຊາດເຢຍລະມັນ ທີ່ຍິງໄດ້ 19 ປະຕູ.
+ ໂຣນາວໂດ້ ເພີ່ມສະຖິຕິຍິງປະຕູຫລາຍສຸດໃນ ຢູໂຣ ຮອບສຸດທ້າຍ ຈາກ 12 ເປັນ 14 ໜ່ວຍ ແລະ ຍິງຫລາຍສຸດທັງຮອບຄັດເລືອກ ແລະ ຮອບສຸດທ້າຍ ລວມ 45 ປະຕູ.
+ ໂຣນາວໂດ້ ເປັນນັກເຕະ ໂປຕູເກດຄົນທຳອິດ ຍິງປະຕູ 3 ນັດຕິດຕໍ່ກັນ ໃນຮອບແບ່ງກຸ່ມ.
ໄຮໄລ້ການແຂ່ງຂັນຕາມລິ້ງລຸ່ມນີ້: