ຢູເຄຣນ ຊະນະ ສະວີເດັນ ສ້າງປະຫວັດສາດ ເຂົ້າຮອບ 8 ທີມສຸດທ້າຍ ຢູໂຣ ຄັ້ງທຳອິດ

ເຕະບານ ຢູໂຣ 2020 ຮອບ 16 ທີມສຸດທ້າຍ ຄູ່ທີ 2 ໃນຄືນວັນທີ 29 ມິຖຸນາຜ່ານມາ, ທີມຊາດສະວີເດັນ (ຊູແອັດ) ທີ່ເຂົ້າມາຮອບນີ້ອີກຄັ້ງໃນຮອບ 13 ປີ ພົບກັບ ທີມຊາດຢູເຄຣນ (ອູແກຣນ) ທີ່ເຂົ້າມາຮອບນີ້ຄັ້ງທຳອິດ ແຂ່ງທີ່ສະໜາມ ຮາມເດັ້ນ ປ໊າກ ໃນນະຄອນຫລວງກາສໂກ ປະເທດສະກັອດແລນ.
ອູແກຣນ ພາຍໃຕ້ການຄຸມທີມຂອງ ອັງເດຣ ເຊັຟເຊັນໂກ້ ອະດີດກອງໜ້າຂອງທີມ ໄດ້ປະຕູອອກນຳກ່ອນຈາກ ອາເລັກຊານເດີ ຊິນເຊັນໂກ້ ປີກຈາກແມນຊິຕີ້ ນາທີ 27′ ແຕ່ ຊູແອັດ ທວງຄືນຈາກ ເອມິວ ຟໍຣສະເບີກ ນາທີ 43′ ເວລາທີ່ເຫລືອບໍ່ມີປະຕູເພີ່ມ ໄປສູ້ກັນຕໍ່ໄລຍະຕໍ່ເວລາພິເສດ ຊຶ່ງ ຊູແອັດ ເຫລືອຜູ້ຫລິ້ນ 10 ເມື່ອ ມາຄຸສ ດານຽວເຊັນ ໄດ້ບັດແດງນາທີ 99′ ເປີດໂອກາດໃຫ້ ອູແກຣນ ບຸກລຸຍປະມານ 10 ນາທີສຸດທ້າຍ ແລະ ມາໄດ້ປະຕູໄຊໃນໄລຍະຕໍ່ເວລາບາດເຈັບນາທີ 120+1′ ຈາກຕົວສຳຮອງ ອາເຕັມ ດັອຟບິກ ຈົບເກມ ອູແກຣນ ຊະນະ ຊູແອັດ ແບບວຸດວິດ 2-1 ສ້າງປະຫວັດສາດໜ້າທີສອງໃນຢູໂຣຄັ້ງນີ້ ດ້ວຍການເຂົ້າຮອບ 16 ທີມສຸດທ້າຍ ແລະ 8 ທີມສຸດທ້າຍ ຄັ້ງທຳອິດ.
ຮອບ 8 ທີມ ອູແກຣນ ໄປພົບກັບ ອັງກິດ ທີ່ຊະນະ ເຢຍລະມັນ 2-0 ຈະແຂ່ງຂັນໃນວັນທີ 3 ກໍລະກົດນີ້ ທີ່ສະໜາມ ໂອລິມປິກ ໃນນະຄອນຫລວງໂຣມ ປະເທດອີຕາລີ.
Photo: UEFA EURO 2020